AGK: Mungesa e zëdhënësit të Qeverisë po e vështirëson punën e gazetarëve

Asociacioni i Gazetarëve në Kosovë tash e disa muaj ka pranuar shqetësime të shumta nga gazetarët për mungesën e zëdhënësit në Qeverinë Hoti.

Sipas gazetarëve po mungon komunikimi i duhur në mes të qeverisë dhe medieve për shkak se nuk po e kanë një adresë zyrtare politike se ku t’i drejtojnë pyetjet e tyre.

Mos emërimi i një zëdhënësi të qeverisë edhe pas pesë muajve të formimit të saj për AGK-në është praktikë e gabuar dhe duhet të ndërpritet.

AGK-ja i kërkon Qeverisë Hoti që sa më parë ta emërojë një zëdhënës në mënyrë që të jenë sa më transparent, jo vetëm ndaj kolegëve tanë gazetarë, por edhe ndaj qytetarëve të Kosovës.