AGK-ja dorëzon komentet për Ligjin e KPM-së në Kushtetuese, shpreh bindjen se do të rrëzohet
Kryetari i Bordit të Asociacionit të Gazetarëve të Kosovës (AGK), Xhemajl Rexha dhe juristja e medias, Flutura Kusari, kanë dorëzuar komentet e përbashkëta për Ligjin e KPM-së në Gjykatën Kushtetuese.
AGK-ja deklaroi se konsideron se ky Ligj është anti-Kushtetues dhe si i tillë do të rrëzohet.
“Ne argumentojmë që procedura e ndjekur gjatë ligjbërjes dhe nenet që rregullojnë përbërjen dhe funksionimin e komisionit, definicionin për mediat online dhe këshillin e ankesave janë në kundërshtim me Kushtetutuën e Kosovës dhe cënojnë, ndër të tjera, pavarësinë e KPM-së, të drejtën e lirisë së medias dhe parimin e barazisë gjinore”, tha AGK.
Duke respektuar në plotni vendimarrjen përfundimtare të Gjykatës, AGK tha se konsideron që nenet përkatëse duhet të shfuqizohen dhe “meqë është e pamundur që ligji i kontestuar të mbijetojë pas shfuqizimit, i propozojmë Gjykatës Kushtetuese që këtë ligj ta shpallë kundërkushtetues”.
Asociacioni i Gazetarëve të Kosovës tha se ka përcjellë rrugëtimin e këtij ligji nga viti 2021 dhe përkundër thirrjeve të vazhdueshme që ligji të draftohet në harmoni me standardet kushtetuese dhe europiane, autoritetet publike nuk kanë treguar vullnet që t’i përgjigjen këtyre thirrjeve.
“Ky rast gjyqësor është historik për shkak se është hera e parë që Gjykata Kushtetuese trajton rast që ka të bëjë me lirinë e medias dhe aktgjykimi do të krijojë precedentë që do të udhëheqë gjykatën për dekada me radhë. Ne shpresojmë që argumentet tona do të bindin Gjykatën që të shpalle ligjin kundërkushtetues”.
