51 vjetori i Ditës së Tokës, Kurti: Ta ripërtrijmë Tokën, ta ruajmë shtëpinë tonë!

51 vjetori i Ditës së Tokës, Kurti: Ta ripërtrijmë Tokën, ta ruajmë shtëpinë tonë!
Eurolinda Zenelaj

22.04.2021 / Lajme

51 vite më parë, më 22 prill të vitit 1970, veprimtarë dhe shtete të ndryshme të Shteteve të Bashkuara, organizuan një mbrëmje vallëzimi për nder të planetit tonë dhe e quajtën ”Dita e Tokës”.

Tash e 51 vite kur filloi për herë të parë të festohet Dita e Tokës, ajo vazhdon të festohet çdo vit në vende të ndryshme të botës me aktivitete të ndryshme.

Ndërsa, në këtë ditë Kryeministri i Kosovës, Albin Kurti përmes një postimi në facebook ka thënë se pas 51 viteve Dita e Tokës e gjen botën në një gjendje të tronditur, ku përveç krizës mjedisore edhe pandemia COVID-19 na ka vendosur para një pikëpyetje të madhe.

Ndër të tjerash në shënimin e kësaj dite, Kurti ka thënë se çdo ditë është dita e tokës, ku ka shtuar se njëra ndër veprimet urgjente të qeverisë së udhëhequr nga ai do të jetë edhe ndalimi i praktikave të dëmshme dhe të paligjshme që e dëmtojnë mjedisin.

Shkrimi i plotë:

Çdo ditë është dita e tokës!

Me 22 prill 1970 mijëra ambientalistë pushtuan rrugët e ShBA-ve.

Ndotja e ajrit dhe ujit, përdorimi i pesticideve, shpyllëzimi dhe dëmtimi i ekosistemeve ishin ndër brengat kryesore që preokuponin çdo të 10-tin amerikan. Me maska në fytyrë shprehnin indinjatën e tyre dhe kërkonin masa emergjente për të adresuar fillimisht nivelin e lartë të ndotjes së ajrit dhe ujit.

Ata ngritën alarmin, që përgjatë viteve mori jehonë edhe në shumë shtete të botës, se njerëzimi po ecte drejtë vetëshkatërrimit. Por, përkundër rritjes së vetëdijësimit shoqëror, presionit publik dhe avancimeve shkencore, këto çështje vit pas viti po bëheshin edhe më sfiduese.

Sot, 51 vjet pas, Dita e Tokës e gjen botën në një gjendje edhe më të tronditur. Kriza mjedisore dhe pandemia Covid-19 na kanë vendosur para një pikëpyetje të madhe. Kthimi në gjendjen që dikur e konsideronim normale nuk është më opcion. Mbajtja e maskave që atëherë ishin simbol proteste sot për ne është bërë e domosdoshme që të ruajmë veten dhe të tjerët.

Pandemia ka shfaqur para nesh brishtësinë e botës tonë. Ka problematizuar veprimet tona ekonomike e shoqërore. Ka sjellë në vëmendjen tonë se përkundër dallimeve e interesave nuk kemi alternativë tjetër përpos të bëhemi bashkë, të mbrojmë e ndihmojmë njëri-tjetrin e ta trajtojmë seriozisht krizën mjedisore.

Kjo ditë Kosovën e gjen në një gjendje më të rënduar në krahasim me vitin e kaluar por politikisht shumë më stabile për t’u përballur me krizat. Dita e Tokës për ne nuk do të jetë dita e vetme kur ne flasim e veprojmë për tokën. Për ne janë të rëndësishme vendimet e veprimet që ndërmarrim sot dhe në vijim. Veprimet tona urgjente do të jenë ndalimi i praktikave të dëmshme dhe të paligjshme.

Mbrojtja e bjeshkëve që janë shkatërruar nga prerjet ilegale dhe pa plan të drunjve e nga nxjerrja e gurëve, ndalimi i degradimit të lumenjve dhe restaurimi i tyre, vendosja e kontrollit mbi gurëthyesit dhe ndalimi i betonizimit të tokës bujqësore janë në listën e prioriteteve tona.

Ta ripërtrijmë Tokën, ta ruajmë shtëpinë tonë!

RAPORTO