Itali, sekuestrohet 126 kg kokainë, në pranga një shqiptar në Brescia

Zbulimi i lëndës narkotike erdhi pas një hetimi të detajuar, i cili nisi nga vëzhgimi i lëvizjeve të dyshimta të një shtetasi shqiptar, i cili frekuentonte një banesë në një komunë të provincës së Brescias.

Gjatë kontrollit të ushtruar në ambientet e marra nën vëzhgim, oficerët e njësisë së policisë ekonomike dhe financiare kanë gjetur 109 blloqe kokainë, si dhe materiale të ndryshme të destinuara për paketimin e saj. Gjithashtu, janë sekuestruar shuma të konsiderueshme parash, të cilat dyshohet se rrjedhin nga veprimtari kriminale, raporton A2CNN.

Autoritetet italiane e kanë cilësuar këtë sekuestrim si një nga më të mëdhatë e kokainës të regjistruara ndonjëherë në zonën e Brescias. Duke marrë parasysh pastërtinë e lartë të drogës së sekuestruar, vlerësohet se vlera e saj në tregun e zi mund të arrinte shifrën prej mbi 14 milionë eurosh.

Shtetasi shqiptar i dyshuar është arrestuar dhe aktualisht ndodhet në burgun e Brescias, në pritje të vendimit të autoriteteve gjyqësore. Ndërkohë, hetimet vijojnë intensivisht me qëllim identifikimin e bashkëpunëtorëve të mundshëm dhe të gjithë rrjetit të shpërndarjes së drogës.