Itali, kapen në flagrancë tre shqiptarë duke vjedhur

Rritja alarmante e rasteve të vjedhjeve në shtëpi në këtë zonë kishte shtuar vigjilencën e forcave të rendit. Në ditët e fundit, karabinierët kishin intensifikuar kontrollet dhe patrullimet në zonë, duke u fokusuar veçanërisht në zonat më të izoluara.

Operacioni kulmoi me arrestimin në flagrancë të tre shqiptarëve, të moshës 27, 32 dhe 39 vjeç, në Casarza Ligure. Të tre u kapën sapo dolën nga një shtëpi e një gruaje të moshuar, të cilën e kishin vjedhur.

Falë ndërhyrjes së shpejtë të karabinierëve, të gjitha sendet e vjedhura nga shtëpia e të moshuarës iu janë kthyer pronarit.

Hetimet e mëtejshme po vazhdojnë për të zbuluar nëse kjo bandë është përgjegjëse edhe për vjedhje të tjera në zonë. Të arrestuarit janë dërguar në burgun e Marasit.