Gjykata Speciale sqaron për kushtet e paraburgimit: “Inspektime të rregullta nga Kryqi i Kuq”
Zëdhënësja e Dhomave të Specializuara të Kosovës (DHSK), Angela Griep, ka dalë në mbrojtje të kushteve të paraburgimit në institucionin që ajo përfaqëson.
Në një konferencë për media të mbajtur sot, Griep ka theksuar se ka pasur disa spekulime rreth kushteve në të cilat mbahet në paraburgim të akuzuarit e Dhomave të Specializuara, por ka siguruar se këto kushte janë nën vëzhgim të vazhdueshëm nga organizata ndërkombëtare.
“Javët e fundit ka pasur komente në lidhje me kushtet e paraburgimit. Dua të shfrytëzoj rastin të sqaroj se objekti i paraburgimit i DHSK-së monitorohet nga Komiteti Ndërkombëtar i Kryqit të Kuq (NNKK), i cili kryen inspektime të rregullta, të palajmëruara dhe të pavarura në objektin e paraburgimit për të këqyrur respektimin nga njësia e paraburgimit të të drejtave të njeriut, së drejtës ndërkombëtare dhe të standardeve të pranuara të trajtimit”, ka deklaruar Griep.
Sipas zëdhënëses, jo vetëm Komiteti Ndërkombëtar i Kryqit të Kuq, por edhe Avokati i Popullit i Dhomave të Specializuara kryen inspektime të rregullta për të monitoruar kushtet e paraburgimit dhe për të siguruar që të gjitha standardet ndërkombëtare të respektohen.