Sulmi kibernetik paralizon sistemet e linjave ajrore, vonesa dhe anulime në aeroportet kryesore evropiane
Një sulm kibernetik ndaj një ofruesi të palës së tretë ka shkaktuar ndërprerje të mëdha në disa nga aeroportet kryesore evropiane, përfshirë Londrën, Brukselin dhe Berlinin. Incidenti ndodhi mbrëmjen e kaluar dhe solli rënie të sistemeve të automatizuara të regjistrimit dhe hipjes në bord, duke detyruar aeroportet të kalojnë në procedura manuale.
Në aeroportin e Brukselit, autoritetet konfirmuan të paktën katër anulime fluturimesh gjatë mëngjesit, përfshirë nisjet drejt Ruandës dhe Amsterdamit. Aeroporti paralajmëroi se ndikimi në orarin e fluturimeve do të jetë i madh, me vonesa dhe anulime shtesë të pritshme.
Në Berlin, udhëtarët u paralajmëruan për pritje më të gjata se zakonisht, ndërsa aeroporti bëri të ditur se po punohet për një zgjidhje sa më të shpejtë të problemit.
Aeroporti Heathrow i Londrës gjithashtu raportoi vonesa, duke përmendur një problem teknik në kompaninë Collins Aerospace, e cila ofron sisteme të regjistrimit dhe hipjes në bord për disa linja ajrore në nivel global. “Pasagjerët këshillohen të kontrollojnë statusin e fluturimit të tyre me linjën ajrore para udhëtimit”, thuhej në njoftimin e aeroportit, duke shtuar se është vendosur staf shtesë për të ndihmuar në menaxhimin e situatës.
Collins Aerospace ka konfirmuar se sulmi ka pasur në shënjestër softuerin e saj MUSE, i përdorur për regjistrimin e pasagjerëve dhe dorëzimin e bagazheve. Kompania tha se ndikimi është i kufizuar vetëm në këto procese dhe se po punohet për ta rikthyer funksionalitetin e plotë sa më parë.
Ndërkohë, linja ajrore EasyJet ka njoftuar se operacionet e saj nuk janë prekur nga ndërprerja.
Autoritetet në Bruksel dhe Berlin thanë se kohëzgjatja e ndërprerjes mbetet e paqartë, ndërsa përpjekjet për zgjidhjen e incidentit kibernetik janë ende në vazhdim.
