Sveçla: Hapësirat e uzurpuara nga strukturat paralele po kthehen në shërbim të institucioneve të Kosovës

Sipas Sveçlës, ky proces vjen në vazhdën e mbylljes së paralelizmave institucionale. “Në vazhdën e mbylljes së secilit paralelizëm institucional sot u kthye në pronësi të komunës së Mitrovicës së Veriut objekti i cili deri tash ishte shfrytëzuar nga strukturat paralele, përkatësisht nga e ashtuquajtura Zyrë për Sport, Rini dhe Shërbime të Specializuara,” ka shkruar ai.

Ministri ka njoftuar gjithashtu se një aksion i ngjashëm është zhvilluar edhe te stacioni i pompave të ujit në fshatin Suhodoll të Mitrovicës së Veriut.

“Epoka e tolerimit të zhvillimit të paralelizmave përballë institucioneve tona ka perënduar dhe nuk kthehet më. Në çdo cep të Republikës sonë ka rend e ligj dhe institucione që janë në shërbim të të gjithë qytetarëve tanë,” ka theksuar Sveçla.

Këto veprime vijnë si pjesë e përpjekjeve të institucioneve të Kosovës për të vendosur kontrollin mbi të gjithë territorin e vendit dhe për të ndërprerë funksionimin e strukturave paralele që veprojnë në kundërshtim me ligjin e Kosovës.