Ja çfarë shkruante LDK Suharekë për Blerim Kuçin para se ta mirëpret në parti

Një postim i vjetër i Lidhjes Demokratike të Kosovës (LDK) dega në Suharekë po qarkullon sot, duke vënë në pah një ironi të dukshme politike. Vetëm pak vite më parë, LDK e Suharekës kishte shprehur kritika të ashpra ndaj Blerim Kuçit, ish-kryetarit të kësaj komune, i cili pritet të aderojë sot në këtë parti.

Postimi i datës 18 shtator 2019, publikuar në prag të zgjedhjeve të 6 tetorit 2019, shkruante:

“Si duket paniku i humbjes në Suharekë çdo ditë e më shumë po rritet. Blerim Kuçi nga frika e humbjes së përkrahjes në popull, paska filluar shumë herët me reklamat e tij. Apo ndoshta tenderi rreth 2 milion i fituar pak ditë më parë ka mundësuar që ai të filloj fushatën ende pa filluar zyrtarisht ajo. Bëni si të doni humbjen e keni 100% të sigurt.”

Ky postim, i nxjerrë nga arkivat e rrjeteve sociale, tregon qartë një qëndrim armiqësor të LDK-së ndaj Kuçit në atë periudhë. Tani, rreth pesë vite më vonë, e njëjta parti pritet ta mirëpresë Blerim Kuçin në gjirin e saj, duke shënuar një kthesë interesante në peizazhin politik të Suharekës.

Ky zhvillim ngre pikëpyetje rreth dinamikave dhe prioriteteve politike, veçanërisht në prag të zgjedhjeve lokale të ardhshme. A ka ndryshuar perceptimi i LDK-së për Blerim Kuçin, apo ky aderim shihet si një lëvizje strategjike për të forcuar pozitat në Suharekë? Kjo mbetet për t’u parë në ditët dhe javët në vijim.