Bislimi sot del para Prokurorisë Speciale për rastin e fabrikës së mbetjeve shtazore

Kjo çështje është bërë pjesë e një hetimi të thelluar, që përfshin dyshime për keqpërdorime në kontratën e qirasë së kësaj fabrike, të cilën e menaxhon Ministria e Bujqësisë, Pylltarisë dhe Zhvillimit Rural. Pikërisht nga kjo ministri, ish-ministri në detyrë, Faton Peci, kishte përmendur emrin e Bislimit gjatë deklarimeve të tij për funksionalizimin e objektit në fjalë.

Hetimet e Prokurorisë Speciale janë shoqëruar edhe me veprime konkrete të Policisë së Kosovës, e cila në fund të muajit të kaluar kreu bastisje në katër lokacione të ndryshme në Prishtinë dhe Ferizaj. Këto ndërhyrje u zhvilluan me qëllim sigurimin e provave për kontratën që dyshohet se është keqpërdorur.

Deri më tani, përveç Bislimit, në këtë rast janë intervistuar edhe vetë ish-ministri Peci, si dhe kryeshefi i Agjencisë së Ushqimit dhe Veterinës, Bekim Hoxha.

Prokuroria Speciale nuk ka dhënë ende detaje të mëtejshme mbi rrjedhën e hetimeve, ndërsa pritet të merren në pyetje edhe zyrtarë të tjerë institucionalë që kanë pasur rol në procesin e dhënies me qira të fabrikës.