Suharekë: Dështon të mbahet gjykimi për vjedhjen e 150 litra naftë

Të hënën, në Gjykatën Themelore në Prizren, dega në Suharekë, ka dështuar të mbahet seanca e shqyrtimit gjyqësor në rastin ku P.P po akuzohet se ka vjedhur 150 litra naftë në një kamion.

Gjykatësi Lavdim Bajraktari ka bërë të ditur se i akuzuari ishte ftuar në mënyrë të rregullt, por shërbimi postar kishte konstatuar se ai nuk ka mundur të kontaktohet personalisht, pasi gjendet në vuajtje të dënimit.

Mirëpo, sipas njoftimit zyrtar të Shërbimit Korrektues të Kosovës, i akuzuari P.P gjendet në liri, raporton “Betimi për Drejtësi”.

Në këto rrethana, gjykatësi Bajraktari ka shtyrë seancën e sotme për 30 qershor 2021, në ora 9:00, ndërsa nga Stacioni Policor në Prizren ka kërkuar që t’ia dërgojnë ftesën të akuzuarit.

Ndryshe, sipas aktakuzës së Prokurorisë Themelore në Prizren, P.P po akuzohet se më 24 korrik 2016, në fshatin Gjinoc të Komunës së Suharekës, me qëllim të përfitimit të kundërligjshëm për vete ose tjetrin, shfrytëzon momentin ashtu që derisa i dëmtuari L.S kishte parkuar kamionetën e tij përballë pompës së derivative “Kometa”, i pandehuri me forcë hap rezervarin e kamionit dhe nga kjo merr një sasi nafte rreth 150 litra.

Për këtë, ai po akuzohet se ka kryer veprën penale “vjedhje e rëndë” nga neni 327 paragrafi 1 i Kodit Penal të Republikës së Kosovës. /BetimipërDrejtësi/