Siguria e qytetarëve Policia e Kosovës me plan operativ për festën e Vitit të Ri

Policia e Kosovës ka përgatitur planin operativ për festën e vitit të ri. Diku rreth 70 për qind e personelit të Policisë së Kosovës janë të angazhuar për të ofruar siguri për qytetarët.

Këtë e ka bërë të ditur për EkonomiaOnline, drejtori i Përgjithshëm i Policisë së Kosovës, Rashit Qalaj, i cili tha se në natën e ndërrimit të motmoteve do të jenë të angazhuar edhe njësiti i reagimit të shpejtë, njësitë speciale si dhe njësi të tjera.

Qalaj tha se shumica e kapaciteteve të Policisë së Kosovës do të jenë të angazhuar meqenëse ne mbulojmë tërë Kosovën duke filluar nga stacionet policore, nënstacionet anë e mbanë vendit.

“Përveç detyrave rutinore që i kemi të cilat i kryejnë stacionet policore, kemi edhe angazhime të njësive të reagimit të shpejtë, qoftë të njësive speciale apo njësive tjera dhe mund të them që kapacitetet e policisë së Kosovës të angazhuara në ofrimin e sigurisë për këto festa do të jetë diku 65 për qind apo 70 për qind të personelit të Policisë së Kosovës”, tha Qalaj për Ekonomia Online.

Po ashtu ai ka bërë të ditur se në tri vitet e fundit vërehet një trend i zvogëlimit të përdorimit të mjeteve piroteknike në Kosovë.

Qalaj i ka bërë apel qytetarëve të Kosovës që të jenë sa më të kujdesshëm në përdorimin e këtyre mjeteve dhe mos t’i lejojnë fëmijët që t’i përdorin ato.

“Konsideroj që është nata e vitit të ri, jam i sigurt që do të përdoren sonte mirëpo apeli jonë kishte me qenë që qytetarët të jenë sa më të kujdesshëm në përdorimin e mjeteve piroteknike dhe atëherë kur të përdorin mos t’i lejojnë fëmijët që mos të lëndohen nga përdorimi i tyre”.

© SuharekaOnline. Të gjitha të drejtat janë të rezervuara.