17.10.2019, 14:21

Mbahet ligjëratë sensibilizuese kundër kancerit të gjirit në Suharekë

Në kuadër të muajit kundër kancerit të gjirit, Drejtoria e Shëndetësisë dhe Mirëqenies Sociale në Komunën e Suharekës, sot në shtëpinë e Fellbahut organizoi ligjëratë sensibilizuese kundër kancerit të gjirit.

Pjesë e kësaj ligjërate ka qenë edhe nënkryetarja e Komunës së Suharekës znj.Mihrije Suka dhe zyrtare të tjera nga Komuna.

Drejtoresha e Shëndetësisë znj.Sale Bytyqi e ka hapur ligjëratën dhe ka folur rreth angazhimeve të drejtorisë dhe të Komunës në përgjithësi për luftën kudër kancerit të gjirit.

Ndërsa ligjëruese e këtij organizimi informues ka qenë Dr.Egzona Kafexholli, e cila i ka njoftuar gratë e pranishme me karakteristikat e kësaj sëmundje.

Ajo, në ligjëratën e saj i ka informuar gratë se cilat janë simptomat e para dhe se si ato vetë në shtëpi mund të bëjnë prova dhe t’a identifikojnë sëmundjen e shumë të tjera.

Ligjërata e sotme është ndjekur me interesim nga gratë, të cilat në një komunikim interaktiv me mjeken dhe drejtoreshën kanë shtruar edhe shumë pyetje lidhur me këtë sëmundje.

LEXO EDHE:  Si po kërkohen para me fotografinë e qytetarit nga Suhareka

Vlen të theksohet se me qëllim të diagnostifikimit të hershëm të kancerit të gjirit Qendra Kryesore e Mjekësisë Familjare në Suharekë është pajisur me Mamograf, i cili do t’i shërbejë grave për t’a zbuluar në fazën fillestare sëmundjen.

© SuharekaOnline. Të gjitha të drejtat janë të rezervuara.