6 raste të dhunës në familje gjatë 24 orëve të fundit

Sipas raporteve të Policisë së Kosovës, ngjarjet e rënda kanë ndodhur në qytete të ndryshme të vendit.

Prishtinë: Më datë 20 prill, rreth orës 19:15, në Prishtinë është arrestuar një burrë kosovar. Ai dyshohet se nën ndikimin e alkoolit ka ushtruar dhunë psikike ndaj një gruaje kosovare dhe disa personave të tjerë. Me vendim të prokurorit, i dyshuari është dërguar në mbajtje për veprime të mëtejshme ligjore.

Podujevë: Një ditë më vonë, më 21 prill, rreth orës 17:40, në Podujevë është raportuar një tjetër rast dhune. Një burrë kosovar dyshohet se ka kanosur dhe ushtruar dhunë psikike dhe fizike ndaj një gruaje kosovare. Pas arrestimit, me vendim të prokurorit, edhe ky i dyshuar është dërguar në mbajtje.

Prishtinë (rast tjetër): Po në Prishtinë, më 21 prill, rreth orës 21:00, një grua kosovare është sulmuar fizikisht nga një burrë kosovar. Viktima ka marrë trajtim mjekësor, ndërsa pas intervistimit të palëve, me vendim të prokurorit, rasti ka kaluar në procedurë të rregullt.

Ferizaj: Në Ferizaj, më 21 prill, rreth orës 18:00, është arrestuar një burrë kosovar nën dyshimin se ka sulmuar fizikisht një grua kosovare. Edhe në këtë rast, viktima ka pranuar trajtim mjekësor, ndërsa i dyshuari, pas inicimit të rastit, është dërguar në mbajtje.

Pejë: Një incident i ngjashëm është raportuar në Pejë, më 21 prill, rreth orës 07:30. Një grua kosovare është sulmuar fizikisht nga një burrë kosovar. Ajo ka marrë ndihmë mjekësore, dhe i dyshuari është dërguar në mbajtje me vendim të prokurorit.

Gjakovë: Në Gjakovë, më 21 prill, rreth orës 20:00, është arrestuar një burrë kosovar pas një mosmarrëveshjeje, i cili dyshohet se ka sulmuar fizikisht një grua kosovare. Pas inicimit të rastit dhe intervistimit të palëve në konsultim me prokurorin, i dyshuari është liruar, ndërsa rasti do të vazhdojë të trajtohet në procedurë të rregullt.