Rastet e vjedhjeve dhe tentimet për kryerjen e veprimeve të tilla janë raste të cilat pothuajse çdo ditë qytetarët i raportojnë në Policinë e Kosovës.

Ky fenomen shkakton pasiguri tek qytetarët e njëkohësisht është edhe sfidë për institucionet e vendit të cilat ballafaqohen me personat e dyshuar të cilët kryejnë veprime të tilla, duke dëmtuar në mënyrë materiale viktimat.

Nga ajo që dëgjojmë dhe shohim në përditshmëri, rezulton se cak i hajnave janë natyrisht gjërat që janë më të vlefshme, si: gjësendet shtëpiake, ari, para, vetura, telefona mobil, e shumë të tjera, shkruan SuharekaOnline.

Një rast i vjedhjës është raportuar të hënën rreth orës 08:20 në Stacionin Policor në Suharekë.

Sipas informacioneve që ka SuharekaOnline thuhet se një person ka raportuar në polici se dy persona të dyshuar në bashkëveprim kanë kryer vjedhje në një market në rrugën “Nënë Tereza” në Suharekë.

Lidhur me këtë rast bëhet e ditur se dy të dyshuarit janë arrestuar nga Policia e Kosovës në Suharekë, ndërsa me vendim të prokurorit janë dërguar në mbajtje.