Paratë, jo gjithmonë, por pothuajse çdo herë janë të rëndësishme për njerzit, të cilët i përdorin ato për nevojat e tyre, qofshin ato elementare, të nevojshme, të obligueshme apo edhe raste të tjera.

Mirëpo në shumë raste, disa persona me apo pa vetëdije fusin në qarkullim dhe deponojnë para të falsifikuara në vende të ndryshme, dukuri kjo e cila është mjaft shqetësuese për shoqërinë.

NJë rast i parave të falsifikuara është raportuar nga Policia e Kosovës në Suharekë, ku kanë bërë të ditur për SuharekaOnline se dje, e premte, rreth orës 14:00, në fshatin Mushtisht të Suharekës me vendim të gjykatës është kryer kontrolli i një kioske.

Sipas policisë në kioskë, e cila është pronë e një të dyshuari janë gjetur dhe sekuestruar 12 monedha nga 2 euro të cilat dyshohet se janë të falsifikuara.

Policia e Kosovës në Suharekë bën të ditur se rasti në fjalë është duke u hetuar dhe se nuk ka ndonjë person të arrestuar.