Në bazë të votave aktuale numri i ulësve për kuvend komunal do të ketë këtë përbërje: AAK – 12, LDK – 9, PDK – 4, VV -4, IQ e Therandës 1 dhe NISMA 1.

Sidoqoftë pas kësaj ndarje tani “gara” për ulëse në kuvendin komunal është bartur brenda partive, ku pas numërimit të votave me postë te disa subjekte politike renditja në listën e rezultateve është rikonfiguruar.

Kandidatët që janë të përafërt me numër të votave dhe që gjenden në listën e mundshme të atyre që mund të sigurojnë ulëse në asamble shpresën për fitimin e saj tashmë e kanë bartur te votat me kusht dhe të personave me aftësi të kufizuara.

SuharekaOnline mëson se nga 12,956 vota me kusht, në Suharekë janë 382 të tilla dhe 85 të personave me aftësi të kufizuara, ku sipas KQZ-së numërimi i tyre pritet të përmbyllet ditën e martë.