23 vite nga masakra e 46 martirëve të fshatit Tërrnje

Disa prej të masakruarve ishin edhe mysafirë nga fshatrat si: Studençan, Randobravë ku ishin strehuar tek shtëpitë e fshatit Tërrnje.

Në këtë masakër makabër kishin mbetur të vdekur shumë gra, pleqë, burra e fëmijë, ku prej tyre 22 martirë ishin nga familja Gashi dhe të tjerët ishin mysafirë e shumë familje të tjera të këtij fshati si: Voci, Muhaxheri, Llapatinca, Balaj, Vranovci, Rexhaj, Krasniqi etj.

Në nderim të të gjithë të rënëve në luftën e fundit, të premten më 25 mars tek varrezat dhe lapidari i Martirëve të fshatit Tërrnje do të bëhen homazhe.

Homazhet në këtë fshat do të fillojnë nga ora 11:00.

“Të nderuar miq dhe bashkëvendas! Ju njoftojmë se me datë 25 Mars 2022, për të nderuar të gjithë të rënët në luftën e fundit, në ora 11:00 do të bëhen homazhe te varrezat dhe lapidari i Martirëve të fshatit Tërrnje. Lavdi të gjithë të rënëve për liri!”, kanë njoftuar përfaqësuesit e fshatit Tërrnje.

Kujtojmë se edhe 23 vite pas, ende janë të pagjetur 14 kufoma të familjes Gashi, shkruan SuharekaOnline.

Familjarët e tyre ende janë në pritje për të kuptuar më shumë për më të dashurit e tyre.

*Të dhënat e pagjeturve janë siguruar nga Komiteti Ndërkombëtar i Kryqit të Kuq