Fandaj i LVV-së: Blerim Kuçi po dëshmon se besnikëria politike është si një abonim mujor: ndrysho partinë, rritet fitimi!

Ky aderim ka ngjallur reagime të shumta, veçanërisht nga asambleisti i Lëvizjes Vetëvendosje (LVV) në Suharekë, Liridon Fandaj, i cili ka komentuar me tone satirike mbi karrierën e Kuçit dhe lidhjet e tij me tenderët publikë.

Kronologjia e Një “Biznesmeni” Politik

Ish-ministri i AAK-së, Blerim Kuçi, ka qenë shpesh në qendër të vëmendjes për angazhimin e tij në projekte me vlerë të madhe. Gjatë kohës sa ishte pjesë e AAK-së, Kuçi ishte përfitues i një tenderi prej 5 milionë eurosh nga buxheti i shtetit. Një shifër e konsiderueshme që, siç ironizon Fandaj, shumica e qytetarëve “e shohin vetëm në ëndrra, ose si numër telefoni kur jemi duke fjetur.”

Kalimi i Kuçit në LDK, veçanërisht në degën e Prishtinës, duket se i ka hapur dyer të reja. Bëhet e ditur se ai ka siguruar një tender tjetër, këtë herë me vlerë 18 milionë eurosh. Kjo rritje drastike, nga 5 në 18 milionë euro, është komentuar si një “evolucion” i karrierës së tij, duke vënë në pah aftësinë e Kuçit për t’u përshtatur në “tregun” dinamik politik.

Fandaj ka shkruar:

Blerim Kuçi: Nga “Kitrrat” në “Portofolin e Artë”

Dikur ministër i zellshëm i AAK-së, me shqiponjën dykrenare në zemër (dhe sigurisht, në xhep), Blerim Kuçi na shpalosi talentin e tij të pafund… për tendera. Pesë milionë euro nga thesari i shtetit, ashtu, si me magji. Një shifër që shumica prej nesh e shohin vetëm në ëndrra, ose si numër telefoni kur jemi duke fjetur.

Por, si çdo biznesmen i vërtetë, Blerimi e di që tregu është dinamik. Ndaj, si një transformer politik, u shndërrua pa problem në “biznesmen” nën hijen e LDK-së në Prishtinë. Dhe çfarë shndërrimi! Nga 5 milionë, u ngjit në 18 milionë euro. Thjesht, evolution!

Ndërsa qytetarët gërvishtin kokën, Blerimi dhe miqtë e tij festojnë me miliona. Një model transparent, apo jo? Kuçi po dëshmon se besnikëria politike është si një abonim mujor: ndrysho partinë, rritet fitimi.”